WACHEZAJI SITA NDANI YA KAGERA NA NYOSSO YUPO

Beki mtata wa kati, Juma Nyosso ataanza kuonekana tena katika Ligi Kuu Bara msimu ujao.

Nyosso amejiunga na Kagera Sugar kwa kusaini mkataba wa mwaka mmoja. Sasa atakuwa chini ya Kocha Mecky Maxime.Nyosso anaungana na wachezaji wengine kama Juma Kaseja aliyewahi kucheza naye Simba, pia ataungana na Mohamed Fakhi kuimarisha ukuta wa Wana Nkurukumbi.

Nyosso anasajiliwa Kagera Sugar baada ya kumaliza adhabu yake ya kufungiwa miaka miwili kufuatia kumtomasa makalio mshambuliaji John Raphael Bocco akiwa Azam FC kabla ya kuhamia Simba wiki hii.

Mshabuliaji wa Simba, Peter Mwalyanzi akimtoka beki wa Mtibwa Sugar, Ally Shomari.
Mbali na Nyosso ambaye alifungiwa akiwa anachezea Mbeya City mwaka juzi, Kagera Sugar pia imemsajili kipa Hussein Kipao kutoka JKT Ruvu iliyoshuka Daraja kutoka Ligi Kuu ya Vodacom Tanzania Bara msimu uliopita.  

Wengine ni beki Japhary Kibaya kutoka Mtibwa Sugar ya Morogoro, viungo Peter Samson Mwalyanzi, Ludovic Venance na mshambuliaji Omary Daga maarufu ‘Dagashenko’ wote kutoka Africa Lyon iliyoshuka Daraja pia.Tayari Kagera Sugar imempoteza mshambuliaji wake tegemeo, Mbaraka Yussuf Abeid aliyesaini Azam FC wiki iliyopita, huku pia kiungo Babu Ally Seif akiripotiwa kuwa mbioni kujiunga na Yanga.